Հալէպ, 8 Դեկտեմբեր 2012

Մեծայարգ

Նախագահ եւ Հոգաբարձութիւն

«Հայաստան» Համահայկական Հիմնադրամի

Երեւան, Հայաստանի Հանրապետութիւն

 

Յարգելի° Ազգակիցներ,

Յանուն Սուրիահայութեան Շտապ Օգնութեան եւ Վերականգնումի Մարմինին, որ կը ներկայացնէ սուրիահայութեան բաղադրիչ բոլոր համայնքներն ու միութիւնները, մեր ուրախութիւնն ու գնահատանքը կը յայտնենք Ձեզի, այն ազգօգուտ հսկայական ծառայութեան ու նուիրումին համար, որ կը կատարէք Հայաստանի ու Արցախի Հանրապետութեանց հզօրացման եւ հաստատումին ի խնդիր:

Սուրիոյ տագնապին եւ մեր համայնքի ծանր իրավիճակին հետեւանքով մենք եւս յայտնուեցանք կարիքաւոր կարգավիճակին մէջ, սակայն հայրենի թէ սփիւռքեան բոլոր կառոյցները՝ մեր ժողովուրդի բոլոր զաւակները իրենց զօրակցութիւնը ցուցաբերեցին ու կը շարունակեն, որպէսզի աւերածութեան ու ահաւոր կորուստներէն վիրաւորուած սուրիահայութիւնը վերականգնի իր պատմական դերակատարութեամբ եւ իր ամբողջանուէր մասնակցութիւնը բերէ, ինչպէս միշտ, հայ կեանքէն ներս:

Արդարեւ, ուրախացանք «Հայաստան» Համահայկական Հիմնադրամի 2012 թուականի թելեթօնին յաջողութեամբ: Մեր ուրախութիւնը կրկնապատկուեցաւ յատկապէս կայացուած այն որոշումին համար, որ լիաբուռն նուիրատուութեանց համագումար արդիւնքէն մասնաւոր բաժին պիտի տրամադրուի սուրիահայութեան: Վարձքը կատար մեր ժողովուրդին: Այստեղ սակայն պարտք կը համարենք շնորհակալութեամբ կարեւոր յիշեցում մը կատարել: Սուրիոյ դէպքերուն հետեւանքով մեր համայնքի զաւակներէն ոմանք մեկնեցան Հայաստանի Հանրապետութիւն, իսկ ուրիշներ՝ Լիբանանի Հանրապետութիւն, հաւանաբար ոմանք այլ մերձաւոր կամ հեռաւոր երկիրներ: Սուրիահայ համայնքի ճնշող մեծամասնութիւնը կը շարունակէ մնալ իր երկրին՝ Սուրիոյ մէջ: Երկրէն ներս ապրող, տոկացող ու գոյութեան պայքարը շարունակող սուրիահայութիւնը բնական իրաւունքը ունի, նաեւ իրեն համար ու յստակ կերպով իր անունով կատարուած թելեթօնէն մարդասիրական իր բաժինը ստանալ:

Վստահ ենք, որ Հայաստանի Հանրապետութեան Վսեմաշուք Նախագահ եւ «Հայաստան» Համահայկական Հիմնադրամի Նախագահ Մեծարգոյ Սերժ Սարգսեանի անաչառ տնօրինումով Սուրիաբնակ սուրիահայերը, որոնց ծով կարիքները համայն հայութեան գուրգուրանքին արժանացան, արդարագոյն բաշխումով պիտի ստանան իրենց օգնութեան հասնելիք բաժինը:

Երախտագիտական հոգիով մեր կատարած յիշեցումը անկասկած արժանի պատասխանը գործնապէս պիտի ունենայ:

«Հայաստան» Համահայկական Հիմնադրամի խնամակալութեան եւ մեր ժողովուրդին կը մաղթենք բազմարդիւն ու նորանոր յաջողութիւններով լեցուն տարիներ:

Սուրիահայութեան Շտապ Օգնութեան եւ Վերականգնումի Մարմին